श्रावण १ - माओवादीले सरकारको नेतृत्वको विकल्प खुला राख्ने निर्णय गरेको छ । शनिबार बसेको पार्टी स्थायी समिति बैठकले पार्टीभित्र र वाहिर समेत सरकारको नेतृत्वको विकल्प खुला राख्ने निर्णय गरेको हो ।
बैठकपछि प्रवक्ता दिनानाथ शर्माले शान्ति र संविधान सुनिश्चित गर्न पार्टीले सबै बिकल्प खुला राख्ने निर्णय गरेको जानकारी दिए ।
आफ्नै पार्टीको नेतृत्वमा सरकारको दावी गर्दै आएको माओवादीभित्र कसलाई प्रधानमन्त्री बनाउने भन्ने बिषयमा मतभेद रहदै आएको थियो । माओवादीमा प्रधानमन्त्रीका लागि अध्यक्ष पुष्पकमल दाहालको विकल्प खुला राख्ने/नराख्नेबारे नेताहरुले आ-आफ्नै धारणा सार्वजनिक गर्दै आएका थिए ।
दाहालको नेतृत्वलाई अन्य दलले नमान्ने र उपाध्यक्ष वावुराम भट्टराईलाई स्वीकार गर्ने अवस्था आए भट्टराईलाई उम्मेदवार बनाउनुपर्ने पार्टीभित्र आवाज उट्दै आएको थियो ।
उनले सकेसम्म आफ्नै नेतृत्वको सरकारको पहल गर्ने र त्यो सम्भव नभएमात्र अरु विकल्प सोच्न सकिने बताए ।
माओवादीले सहमतीय सरकारको प्रयास असम्भव भए बहुमतीय आधारमा समेत सरकार निर्माणको कसरत गर्ने भएको छ ।
नेपाली कांग्रेसले लडाकु समायोजनको संख्या एक साताभित्र तोकेर चार महिनाभित्र समायोजन तथा पुनःस्थापनाका सम्पूर्ण काम सक्नेगरी शुक्रबार सार्वजनिक गरेको कार्यतालिकालाई माओवादीले गम्भीर र आपत्तिजनक भनेको छ । प्रवक्ता शर्माले उक्त प्रस्ताव माओवादीलाई आत्मसर्पण गराउने खालको भएको प्रतिकृया दिए ।
शर्माले कांग्रेसको प्रस्ताव शान्ति सम्झौता र अन्तरिम संविधान विपरित भएपनि यसमा छलफल गर्न सकिने बताए ।
उनले बिभिन्न घटनामा संलग्न भएको भनिएका माओवादी सेनाको पाँचौ डिभिजन कमाण्डर कालीबहादुर खामबार अध्ययन अनुन्सधान भइरहेको भन्दै एकदुई दिनमै सत्यतथ्य बाहिर ल्याइने बताए ।
No comments:
Post a Comment